- الساحرة الصغيرة -

يعنى هو الموضوع أن السنة دى أخويا فى أولى جامعة …. و بما أن ده مكان جديد عليه .. فكان لازم حد من الأقارب و الأحباب اللى فى الجامعة بقالهم سنة ولا اثنين يجوا يدولوا النصايح ال 10 للجامعة … يمكن النصايح ميكنوش عشرة بس أهو أى اختراع و السلام ….

1 _ سيادتك من أول محاضرة أول ما تخش تدور على ابن الدكتور و خليك صديقه المفضل …و لو ملقتش ابن الدكتور دور على ابن المعيد و لا حتى ابن أى وزير انشالله وزير الرى حتى .

2 - أوعى تصاحب واحد شايف نفسه و ولا واحد عايش دور الجامد .

3 - لو واحد بذقن قالك سلام عليكم ما تردش عليه و لا تعبره ….

و لا تكلمه خالص ولا تكون ضده لأن دول اساميه فى أمن الدولة و اللى ضدهم شغال مع أمن الدولة وبرضه اساميهم عندهم .

4 - دى بقى كانت نصيحة غظتنى جدا …. ملكش دعوة بأى نشاط فى الجامعة و لا اتحاد الطلبة و لا غيره و لا أى حاجة ….انصيحة دى بقى كانت من أمى …

طبعا أنا بقى اشطت غيظا و قولتلهم بقى ازاى يعنى مالوش دعوة بأى نشاط ده فى اتحاد طلبة و مجلات وحاجات كثيرة لازم الواحد يشترك فيها …..

ولااااااا حد عبرنى …. و كأننى من عالم تانى ومش من هنا ….

طب يعنى ده مثلا يعتبر شىء كويس … لما أنت لسة صغنتت كده تسمع الكلام ده … مش دى حاجة تنرفز … كل واحد أهله يقولوله امشى جنب الحيط … اوعى تطلع فى مظاهرة … ملكش دعوة بأى نشاط …

معلش احنا شعب رجعى و جبان و كل واحد بيخاف على نفسه ….. و ماله … هو احنا ضايعين من شوية ….

لا و ألذ حاجة بقى أن بعد شهر من بداية الدراسة أخويا بقى جاى فرحان من الجامعة و مبسوط و قال كان عندنا انتخابات اتحاد الطلبة و رشحت اتنين معرفهمش نياهااها …..

طبعا أنا مش عارفة ايه نظام الإنتخابات دى و افتكرت أنه كده خلى الموضوع كوسة …. و قلتله طب يه ترشح اتنين ماتعرفهمش ما رشحتش حد كويس ليه … راح قايلى حكمة عظيمة … قال لى يا بنتى الانتخابات دى بيفوز فيها اللى عايزينه يفوز … الانتخابات دى حاجة كده مالهاش لازمة …

حلو قوييييييييي يعنى هى كوسة لوحدها …. و ماله … احنا شعب نحب الخضار … الحياة عندنا كوسة و بامية …. و الشعب فرخة بكشك …

و الحكام بطوونها مليانة … و لازم الواحد يمشى منتشى كده و فرحان ….

أنا مش فاهمة يا جماعة … أنتم مزعلين نفسكم و قاهرينها على حالة البلد كده ليه …. ده احنا فى أحسن حال ………….

آآآآآآآآآآآآآآآآآآآآآآآآآآآآآآآآآآآآآآآآآه