لطالما كرهت منتهى الأشياء.. و رقصت دوما على السلالم ؛ لألا تفقد المعاني مرادفاتها

حكاية شعب

خوانى … تسمحولى بكلمة … الحكاية مش حكاية السد… حكاية الكفاح اللى ورا السد .

حكايتنا أحنا .. حكاية شعب للزحف المقدس قام و سار …. شعب زاحف خطوته تولع شرار … شعب كافح و اكتبله الانتصار ..

تسمعوا الحكاية ؟؟!

 

أنا واثقة أن فى ناس كتير ما سمعتش الأغنية دى … أو ماتعرفش منها غير قولنا هنبنى و آدى احنا بنينا السد العالى …

اكيد عمركم ما سمعتوها كاملة … يبقى لازم تسمعوها ….

لازم تسمعوا حكاية الشعب زى ما قالها العندليب ….

عارفين قال ايه ؟! اكمل …. بس برضه لازم تنزلوا الأغنية و تسمعوها .

***

هى حكاية حرب و تار بينا و بين الاستعمار … فاكرين لما الشعب اتغرب جوه فى بلده ؟ ” آه فاكرين ”

و المحتل الغادر ينعم فيها لوحده …. ” مش ناسيين ”

***

بجد فى جزء من الأغنية و ان لم كن الأغنية كلها لازم تركزوا فى كويس و تحسوه …

لما بيقول العندليب ….
انتصرنا يوم ما هب الجيش و ثار … يوم ما اشعلناها ثورة نور ونار ….

يوووم ما أخرجنا الفساد … يوم ما حررنا البلاد … يوم ما حققنا الجلاء ….
 

***

طبعا عايزين تقولوا ايه دخل ده بموضوعنا … اقول انا ان ده ليه دخل كبير قوييييي ….

خلونا نعمل مقارنة بين حالنا زمان و حالنا دلوقتى ….

احنا مش هنقول العيب ع البلد …. لأن البلد هى البلد … ما تغيرتش …. احنا اللى اتغيرنا …. و اتبدلنا ….

معلش خلونا نكلم بأوراق مكشوفة ع الآخر…..

 

***

تعالوا نكلم الأول ع الحاجات اللى نملكها ….

احنا بنملك الجهل … ( بلاش الاستغراب ده كده )

و الاسفاف ( و أكيد ده شىء معروف )

و السطحية ، و التفاهة ….

و بالنسبة للحاجات اللى مش عندنا ….

الضمير و الأخلاق و الوطنية ….

و بلاش تثوروا عليا من أولها …. أكيد مش الكل تنطبق عليه الأوصاف السابقة … بس برضه الظاهر دايما فى مجتمعنا الفساد ….

و بالمناسبة احنا بنملك الفساد ( زى أى مجتمع طبيعى يعنى …)

فكروا فى الكلام السابق ده و بعدين أنا هبقى أرد على كل الأشياء اللى قولتها لو حد ما لقاش إجابات للأسئلة دى …

***

بما أن احنا هنكلم عن نفسنا ع المكشوف يبقى احنا معترفين أن العيب مش فى مصر … العيب فينا احنا …( أى اعتراض ع الكلام ) قولوا ما تكسفوش يعنى ….!

العيب فينا ليه بقى … عشان احنا عندنا مرض اسمه فقدان الانتماء … الأول عايزة أسألكم سؤال ….

حد يفتكر انه و هو صغير باباه و مامته علموه ازاى يكتب كلمة مصر زى ما كانوا بيضربوه عشان يعرف يكتب أسد …. طب لما كانوا خايفين عليكم تتوهوا و قعدوا يحفظوكم اسمكم و عنوانكم … حد فيهم مرة قالك أنت مصرى … لازم تحفظ ده كويس ….

و لا هم كانوا خايفين علكم تتوهوا و أنتم صغيرين بس … و لما تكبروا و تتوهوا دى مش قضية !

أهو بقى اللى حصل … أنت اتعلمت و كبرت و عشت و قربت تموت و أنت ملكش هوية …. هويتنا ممسوخة ….

مالناش كده شىء بتاعنا احنا نتمسك بيه …

أنت ليك أن المغنى الأجنبى ده لبس آيس كاب …. على طول نزلت لميت الآيس كاب اللى فى البلد … مش عارف الممثلة دى لبست خاتم فى رجلها …. روحى يا حبيبتى و البسى خاتم فى رجلك …. و ماله … ما احنا فاضيين ….

هو احنا لقينا حد يقولنا احنا مين و ماسمعناش كلامه ….

حبها … حب بلدك … خاف عليها … لأن اللى يمسها يمسك ….

و حقيقة يا جماعة حاجة انا اكتشفتها …. أنت مش هتحب البلد كده خبط لزق …. اقولكم ….

أول حاجة انتموا ليها …. هتلاقوا ان بقى عندكم و لاء ليها …. صدقونى مع الوقت الولاء ده بيتحول لحب جارف …

و حتى لو ما اتحولش ما تنتمى و يبقى عندك ولاء … و مش هنطلب منكم اكتر من كده ! …..

***

Advertisements

5 تعليقات

  1. ياسمينة

    بسم الله الرحمن الرحيم
    عزيزتى:
    بصى أنا معاكى فى حاجات و حاجات لأ
    صح البلد ماتغيرتش
    ومعظم الناس(اكيد مش كلهم) ماتغيروش بس…الناس اتشغلت تدور على لقمة العيش عشان تأكل عيالها وتعرف تعيش ،و الحكومة بتشغل الناس بلقمة عيشها عشان مايفضوش لحاجة تانية،
    بس بحس دلوقتى إن على قد مافى ناس مش فارقة معاها الكلام ده كله ولا حاجة بالنسبة له إلا إن فى ناس تانية مستعدة تموت عشان البلد دى (بس مش عشان الحكومة )

    بحس إن معظم الآباء و الامهات بيخافوا على ولادهم من المشاركة فى السياسة
    بيقولوا لأولادهم بلاش مشى فى مظاهرات و ما يشبه ذلك
    اكيد الأهالى خايفة على ولادها من اللى بتسمعه ممكن يحصل لواحد من ولادها
    ولا إيه رأيك؟؟؟؟

    تحياتى
    (على فكرة:المدونة عسولة)

    ديسمبر 16, 2007 عند 12:00 ص

  2. littlewizard

    بعا أنا معاكى فى كل الكلام اللى أنت قولتيه …. بس اللى أنا مش فهماه ليه الواحد بيبقى كاره بلده … و بتبقى كارثة أنه مصرى … مع أن ده شىء المفروض الواحد يفخر به ….
    أنا مش هقول ان حالا كويس و لا أن الحياة مابقتش صعبة و لا هقول ان احنا عايشين فى جنة …
    الفرق بينا و بين البلاد التانية أن برة الناس فعلا عايزة تعيش ….
    انما أنتى لو مشيتى فى الشارع المصرى تحسى ان الناس فقدت الرغبة فى الحياة و ان هم يتحسنوا ….
    متفقة معاكى فى اللى قولتيه …
    و أتنى أن أرى تعليقاتك دايما منورة المدونة …

    ديسمبر 16, 2007 عند 6:52 م

  3. ياسمينة

    بسم الله الرحمن الرحيم
    عزيزتى:
    الحكاية مش إن الواحد كاره بلده ولا مش عايز يعيش زى الناس اللى بره الحكاية إن اللى حتى عايز يعيش مش عارف ،أنا معاكى إن مفيش اى مبرر إنك تكره البلد لأى سبب ،بس قصدى إن الانتماء دلوقتى ماصبحش من الاولويات
    هكمل بعدين عشان لازم امشى دلوقتى
    راسلينى إن احببتى يشرفنى التعرف إليكى و كل عام و انتِ بخير
    تحياتى مؤقتا

    ديسمبر 17, 2007 عند 4:49 م

  4. littlewizard

    السلام عليك يا ياسمينة ….
    أنا ههقولك حاجة …. الانتماء مش مبقاش فى الأولويات .. الانتماء مبقاش موجود أصلا … لا فى أولويات ولا فى التفكير من أساسه ….
    لما واحدة لسة صغيرة و حتى لسة ماكملتش 14 سنة و لا أى حاجة تبص ع العربيات اللى فى الشارع و تقول ان خسارة العربيات دى تمشى فى مصر …. ( أصل العربية أحسن من مصر ) …. و تقول ايه … انها لو جاتلها أى فرصة انها تهاجر أمريكا مش هتتردد ولو للحظة … و يا ريت ده بيكون كلام واحد بس …. ده طول ما أنتى ماشية تسمعى الكلام ده …. لما هم لسة قدالكتاكيت و يقولوا الكلام ده … أمال لما يكبروا و مشاكلهم تبقى أكبر من زحمة الشوارع و القرف من المرور هيعملوا ايه ؟!
    أنا شايفة أن دى غلطة الآباء زى ما قلت قبل كده … لأن مافيش أى أب أو أم قدروا يعلموا ولادهم احنا مين و لا مكانتنا ايه و لا حتى يعنى ايه انتماء ….
    أنا آسفة يا ياسمينة طولت عليكى … مستنياكى … و كل سنة و أنت طيبة

    ديسمبر 19, 2007 عند 1:20 ص

  5. ياسمينة

    بسم الله الرحمن الحيم

    معلش على التأخير
    كل سنة و انتى طيبة اولا
    ثانيا:ماطولتيش ولا حاجة احب اسمع رأيك
    فعلا فى اهالى كتير مابتعلمش اولادها الانتماء يمكن عشان الموضوع مش فى دماغ الاهالى و لأن الاهالى خايفين على ولادهم من اللى يسببه توابع الانتماء وفى فعلا ناس كتير صغيرة نفسها تهاجر بس…فى ناس منهم لما تكبر بتحس بقيمة البلد و فى ناس بتسافر عشان لقمة العيش مع ارتباطها ببلدهاو فى ناس تسافر و يمكن تحاول تنسي كل حاجة تفكره بالبلد ,موضوع مكعبل فى بلد ناس كتير من اللى عندهم انتماء مش هيعجبهم حال البلد،بس برضه مفيش اى مبرر لعدم الانتماء للبلد
    تحياتى

    ديسمبر 20, 2007 عند 11:26 م

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s