لطالما كرهت منتهى الأشياء.. و رقصت دوما على السلالم ؛ لألا تفقد المعاني مرادفاتها

كلام و نفسي أقوله ..

هو كلام و نفسي أقوله .. هو مش هيعجب ناس كتير لكن لو أنا مقلتوش هاموت كمدا ..
بصوا يا جماعة أنا مصرية  الحمدلله .. أنا شايفة إن دي نعمة كبيرة جدا من عند ربنا … بس ده مينفيش اني اكتشفت انني  كمان إنسانة و زي ما قلت قبل كده أنا باحب كل مكان على الأرض و بانتمي ليه ..  يعني تقدروا تقولوا  اني مصرية و فلسطينية و عراقية و لبنانية و سورية الخ الخ .. حتى لو الخ هذه ليست عربية .. حتى لو ليست إسلامية .. ما يهمني في كل ذلك هو انني مرتبطة بالمكان بسبب وجود البشر فيه .. لأنه كلهم اخواتي .. ” لن تؤمنوا حتى تراحموا … قالوا : كلنا رحيم يا رسول الله .. قال انها ليست رحمة أحدكم صاحبه لكن رحمة العامة “صدق رسول الله  صى الله عليه و سلم  .. و أكد على التعليم  تجربة واقعية مع أشخاص  و بالمناسبة هؤلاء الذين أكدوا على هذا ليسوا عرب و ليسوا مسلمين .. لحسن تسيئوا الظن بالعرب و لا حاجة .. ما هو العرب مالهمش خير في حد ..

الموضوع ده باكتبه بعد ما زهقت و اتخنقت من كل اللي بيحصل حوالينا … المهم يعني أنا عايزة أوصل لايه من كل المقدمات دي .. ببساطة شديدة جدا أنا عايزة اقول أن زي انه ميرضنيش اللي بيحصل  في فلسطيين و العراق و لبنان لأن كلهم بلادي ميرضنيش برضه الهجوم على مصر .. انتم شايفينها غلطانة .. صح ؟ طيب ما أنا شايفة ان الفلسطينيين غغلطوا من -60 سنة لما في ناس منهم باعوا أراضيهم لليهود .. بس ده مش مبرر للي بيحصل دلوقتي لأنه الشعب اللي موجود دلوقتي مش هو اللي باع .. ومش هو اللي هجرها .. و ده مش ذنبه أساسا .. ده ذنب 3 مليار .. آه رقم كبير شوية ماشاء الله ..  فعيب قوي تبقوا حلوين و عزوة كده و تعلقوا كل مصيبة على أكبر شماعة … و كأن مصر دي هي اللي عملت كل بلاوي الدنيا … معلش يعني اعذروني  لو كل حاجة بسبب مصر زي ما أنتم بتقولوا يبقى ال 3 مليار نشيل منهم 80 مليون يفضل الباقي 2 مليار و شوية بطيخة مالهمش أي لازمة في الحياة يعني و لا ايه ؟ .. أنا مجبتش حاجة من عندي كلامكم هو اللي بيقول كده .. طيب لما أنتم شايفين  80مليون وغد هم السبب في كل مشاكلكم .. مبتحلوهاش ليه بقى ؟ مستنيين مين يجي يحلها .. ما هو احنا بنيلها حلوها انتم بقى ..


الموضوع ده يعني باحاول أقولكم فيه على وضعنا العربي ..اللي لا يسر لا عدو و لا حبيب ..احنا 3 مليار و معظم مشاكلنا تتلخص في 3 مليون .. و مع ذلك مش عارفين ناخد منهم لا حق و لا باطل ..  لأن المشكلة الأكبر فينا احنا .. احنا منافقين و بنكره بعض و محدش عنده أي استعداد انه يعمل حاجة عشان أخوه … آه كل وزير ياخدلي التاني بالحضن بس اللي في القلب في القلب … عامة أنا عمري ما هاجبرك انك تحبني لكن على الأقل عاملني على اني أخ ليك و مصلحتك أنت من مصلحتي ..

المشكلة اني مكنتش اعرف ان في كره للدرجة دي .. و مكنتش اعرف ان حد ممكن يشيل حقد جواه لمدة سنين طويلة و يطلع كل الحقد ده فجأة لو الكلام معجبش السيادة ..

لما ياما شفت حاجات مكنش عمري أحب أشوفها .. طوال فترة تدويني لقيت العجب ..  يعني احكيلكم عن ايه و لا ايه ؟ يعني مرة كنت اشااهد فيديوهات على اليوتيوب و عادي باشوف أغاني أطفال .. بس فلقيت أغنية أ ب ت بتاعة الأطفال .. آه والله أغنية أطفال .. فقريت التعليقات عليها .. لقيت واحد سعودي داخل يشتم المصريين … ليه ؟  عشان الأغنية بتقول أ ب ت و مش بنقول ألفُ باء ٌ .. آه والله ..طبعا أنا باقرا الكلام و مذهولة كل الشتايم دي على أغنية أطفال  .. لا والله ده أنتم فعلا هتحلوا مشاكل الوطن العربي كله.. .. طبعا بقى المصريين خدتهم الوطنية ..و داخلين بقى  بوطنيتهم دي .. ما علينا ..

موقف تاني و كلام عجيب من مدون سعودي يقول انه كاتب ساخر .. ماشي ماختلفناش .. ادخل اقرا اللي مكتوب … عناوين عجيبة كده .. بيقول ان احنا أصلنا يهود .. و ان احنا فراعنة زي فرعون .. عشان كنا فراعنة .. طيب ما خلاص مادام احنا يهود عشان كان فيه يهود في مصر على حد قوله .. يبقى بقى أهل الخليج مشركين .. ببساطة شديدة .. بس طبعا ده اللي المنطق يقوله لو اللي هو بيقوله صح .. بس ده مش رأيي .. بس المهم أنا قعدت أفكر في الموضوع .. لقيت أن العرب كلهم أصلا لو هنرجع لأصلهم هيطلعوا مصريين .. :0 ما هو أصلكم أحفاد سيدنا إسماعيل عليه السلام و السيدة هاجر كانت مصرية .. يبقى هنقعد نلف كتير و يطلع العرب أصلهم منين في الآخر ؟

من الحاجات التانية اللي قبلتني حب العرب الشديد للرئيس الراحل جمال عبد الناصر .. عامة ده ميشكلش عندي أي مشكلة .. بس لما نيجي نعرف سبب الحب ده هيبقى النتيجة انهم بيحبوه بسبب سلبيتهم .. اصبروا عليا بس و أنا هاقول كل اللي عندي … عبد الناصر بالنسبة ليا له ” أشياء يشكر جزيل الشكر عليهم …

أول حاجة بناء السد العالي  ..

ثاني حاجة تأميم شركة قناة السويس

تالت حاجة بقى أني مشفتش قبل كده و لا هاشوف رئيس يتنحى عن منصبه  بسسب هزيمة في حرب ..

بصراحة كرجل أنا أحترم الشخص اللي يقدر يحصل على حب مئات الملايين  لغاية دلوقتي ..

بس أنا لما هتكلم عنه كرئيس لبلدي .. غير لما أي حد مش مصري يتكلم عنه .. عشان أنتم هتكلموا عنه على انه كان قائد للعرب كلهم .. ماشي ده شيء جميل ان العرب كلهم يجتمعوا مع قائد .. بس مفيش أبدا حد يصلح بره قبل جوه ..  أنتم حبتوه عشان هو تحمل مسئوليتكم .. و هو ده اللي أنتم عايزينه من أي حد .. لكن على مستى أعماله في مصر هاقول هو عمل ايه ..

أول مصيبة .. مراكز القوى .. اللي يقال انه مكانش يعرف حاجة عنها .. هو لو كان عارف تبقى مصيبة و لو مكانش رئي دولة عارف ايه اللي بيحصل في بلده تبقى كارثة ..

تاني حاجة  تفتيت الأرض الزراعية .. 5فدادين للفلاحين .. فلاح بقى يبيع الفدادين يزرعها يبنيها .. يعني مبقتش أرض على بعضها كده مزروعة لأ كل واحد عمل اللي هو عايزه .. فالأرض باظت ..

القطاع العام .. لقطاع العام ده بقى أنا مش عارفة اقيمه .. بس اللي اقدر اقول انه كان بيخسر البلد .. البائعين في المحلات أو في أي مكان مكنوش بيشتغلوا هم مش هممهم لأنه كده كده هم ليهم مرتبهم آخر كل شهر سواء اشتغلوا و لا ماشتغلوش ..

يا سادة كان في 6 أهداف للثورة اللي احنا بنحتفل بتاريخها كل سنة … اللي هيقولي على هدف واحد اتحقق هشكره من كل قلبي ..

بعد كده الوحدة مابين مصر و سوريا .. كلام جميل .. بس بعتلهم مين ؟ عبد الحكيم عامر .. و الراجل كان بيعامل الوريين على انهم مواطنين من الدرجة التانية فطبعا باظت الحكاية كلها …

و النبي في رئيس يمسك جيش دولة لواحد بيروح مكتبه سكران الساعة 2 ؟  و عبد الحكيم كان سبب النكسة و الحمدلله .. كان فيه حبة اشتباكات بسيطة بين بعض السوريين و الإسرائيليين .. قاموا أصدروا قرار بقفل خليج العقبة .. ده كده من غير أي حاجة معناه إعلان حرب ..

بس فده الرئيس جمال عبد الناصر .. و أنا طبعا باقول للي فهموني غلط و أكيد في ناس كتير فهموني غلط و ده الطبيعي لأن دي مشكلة المصريين إن أنا مبقولش نكره جمال عبد الناصر .. أنا شخصيا في أشياء  في عبد الناصر تجعلني أقدره و أحترمه و اخلع له القبعة .. و عادي جدا لما يكون في سلبيات في أي رئيس دولة .. و ده مش معناه أنه شيطان رجيم … اللي أنت مش ممكن تتخيل حجمه هو المسئولية .. يعني أنا لو اتحملن مسئولية فرد واحد بس جنب مسئوليتي ممكن منمش بالليل .. فتخيل أنت لما تبقى متحمل مسئولية ملايين ..  و عبد الناصر مكانش مفروض يشيل مسئولية الوطن العربي كله  بس والله الراجل كتر خيره ..

مشكلتنا احنا اننا كنا كلنا متكلين على عبد الناصر .. و عايزينه يتحرك لنا .. هي دي الحقيقة اللي بتقول ان العرب سلبيين .. فلما مات عبد الناصر العرب معرفوش يعملوا حاجة
.. في  معظم كلام المدونين العرب لمست الحتة دي .. ان هو احنا لأ منعملش .. لازم حد يجي يعملنا .. زي موضوع باراك أوباما كده .. كلنا كنا عايزينه .. و لما اختار مستشاره لأ ده طلع ابن 60 في 70 … طب ليه يا جماعة ..هو الشعب الأمريكي كان مختاره عشان يحل مشاكل العرب … و لا هو المفروض عليه يعمل للعرب .. و الله ده واحد بيعمل لدولته ايه مشكلتكم في الموضوع .. هم و اليهود أحباب مفيش مشاكل .. يبقى ايه الخطيئة اللي هو ارتكبها ؟

المشكلة بس ان احنا كنا منتظرينه يشتغلنا و طلع لأ .. فعشان كده بقى وغد و يستهل الاعدام رميا بالجزم ..

كان نفسي اتكلم عن السادات بس للأسف مفيش وقت … حاجة بس صغيرة عن قناة السويس و انه مصر بتعدي السفن الأمريكية اللي بترسل أسلحة لإسرائيل …

محمد علي لما الفرنسيين عرضوا عليه مشروع حفر القناة رفض الفكرة و قالهم لا اريد بفورا في مصر.. و البسفور ده مضيق في تركيا .. كانت أياميها روسيا بتتحكم فيه عشان هي دولة حبيسة .. فوجودو قناة تخدم العالم كله ده مشكلة ..  و مينفعش تقفلها على حد .. في قوانين دولية بتقل ان لو أنت عملت كده يبقى من حق أي دولة بتتنفع منها انها تحاربك ..فمعلش يعني اللي فاكر ان الموضوع سلاطة و ممكن نوقف السفن  الأمريكية و نسحب رخصها و الحكاية اي عك في أي بتاع يروح يذاكر القوانين الدولية ..

خلوا بالكم ان أنا مجبتش سيرة أي حكومات حالية في الموضوع ..

و كفاية قوي كده عليكم .. إحتمال اكمل  الموضوع ده بس بعدالامتحانات .. دعواتكم .. أنا نفسي محدش يزعل مني .. عشان أنا بقولكم على الحقيقة .. الموضوعع من أوله لآخره فيما عدا قناة الويس وجهة نظر يعني مفيهاش صح و لا غلط .. آه صحيح من أغبى الحاجات اللي بيعملها العرب انهم بيتخانقوا على وجهات النظر .. و ده موضوع تاني ..

سلامي لكم جميعا إخوتي



Advertisements

8 تعليقات

  1. السلام عليكم ورحمة الله وبركاته ,,,

    احيكي على جرأة الطرح … لأن انا كمان كنت هبدأ أكتب في نفس الموضوع .

    أنا مش هقولك انه مصر مرفوع من عليها العيب وانه هي 100 100 دلوقتي ولا حاجة لأ مصر فعلا وقعت في ورطة كبيرة جداً .

    بس قبل ما أشرح واقول الورطة واسبابها أحب أقول بس انه مصر اللي الناس ما صدقت ووجدت حاجة تقولها عليها او تمسكها عليها او تتهمها بالتواطؤ … انه مصر دي أكتر دولة عربية على مر التاريخ خدمت العرب كلهم وخدمة القضية الفلسطينية بالذات أكتر من أي حاجة تانية … بالأضافة الى انها الدولة الوحيدة اللي دخلت مواجهة وجها لوجه مع اسرائيل ورجعت حقوقها كلها … وميجيش حد يقولي اصل احنا عملنا معاهدة سلام ومش معاهدة سلام … مصر كانت ساعتها في حالة حرب بتسنزف جميع مواردها … وكان لازم انه احنا نعمل هدنة نقدر نقف بيها على رجلينا … في الوقت اللي مكانش حد واقف معانا فيه غير الملك فيصل – رحمه الله – و سوريا … وانا مش محتاج افكركم بقصة الكويت والشحات جاي يشحت … لحد امتى هتفضل مصر تعمل وتتعب عشان العرب وهما بينكروا الفضل والجميل احنا مش عايزين منهم حاجة و هما اللي محتاجنا مش احنا … ان كان علينا احنا نقدر نعيش حياتنا مبسوطين على الآخر لو من غير ما نلتفت للعرب … امريكا قبل ما تحط رجليها في المنطقة ايام حرب العراق الاولى وده موقف انا اقدره جدا واحترمه لمصر ولسيادة الرئيس مبارك مصر قالت للعرب احنا نمشي الموضوع ودي ونحله عرب في بعضينا قبل ما امريكا تدخل وتحط رجليها وساعتها محدش هيعرف يطلعها … ولكن لا حياة لمن تنادي وحصل اللي امريكا خططت له … انا مبقولش انه مصر خلاص هي الكل في الكل … لأ احنا كلنا عرب والمفروض اننا متحدين تحت لواء الاسلام اولا والعروبة ثانيا … وكلنا بنكمل بعض … ولكن عندما تحدث مثل ردود الفعل تلك الى درجة اتهام المصريين بالخيانة … يبقى لازم اتحيز لأني مصري ومصريتي هي لواء على صدري بفتخر بيه .

    أما الورطة اللي مصر وقعت فيها ودي من وجهة نظري كانت مقصودة من اسرائيل وهي انه اسرائيل توهم الناس انه مصر متواطئة في الحرب لما ليفني تروح عاصمة من اهم عواصم الدول العربية وتعلن الحرب من هناك او بمعنى تاني توهم الناس بكده … يبقى الغرض هو ايقاع مصر في هذه الأزمة … وهنا كان المفروض انه الخارجية المصرية تتعامل مع الموقف بمجهود أكثر من كده شوية بحيث انها تفهم الناس انه مصر مش متواطئة ولا يمكن ان تتواطئ في يوم من الايام ضد المصلحة الفلسطينية .

    انا آسف على طول التعليق ولكن الموقف استلزم كده … ونقطة أخيرة أحب انبهك ليها … يا ريت ما نحكمش على شعب او جنسية بتصرف احد الحمقى فكما انت لا ترضي ان يحكم عليكي شخص لأنك مصرية اي حكم باطل لأنه رأى تصرف احمق من مصري آخر فهو كذلك لا يقبل بذلك … والعرب كلهم أخوة وتصرف ذلك المدون السعودي لا يمثل اطلاقا الشعب السعودي فأنا عاشرت الشعب السعودي واعلم اخلاقه واصله جيدا واعلم ان هذا الشخص لا يمثل السعودية ولا حتى الدول الخليجية .

    تحياتي

    يناير 3, 2009 عند 12:52 م

  2. الساحرة الصغيرة

    السلام عليكم و رحمة الله و بركاته …
    مبدأيا يا حسن أنا مش ماشية بنظام الحسنة تخص و السيئئة تعم .. فمش هحكم على بلد كاملة من خلال تصرف شخص … و أنا أكثر الأخوات اللائي أعتز بصداقتهن من السعودية …
    صراحة الموضوع تحدث عن السلبيات التي عايشتها أثناء فترة تدويني .. و لكن تخيل أنت حينما يكون ه الجميع في وقت واحد بدلا من إنقاذ الفلسطينيين هو صب اللعنات على بلد واحدة .. و كأن المشكلة كلها و الأزمة اللي حاصلة في غزة وليدة اليوم أو الأمس .. يعني هو لازم حد يفكرهم كل شوية ان كلهم كانوا مسئولين عن اللي حصل من 60 سنة ؟
    عمر ما حد يقدر يزايد على مصر أو على دورها .. و مفيش شهداء من أي دولة عربية راحوا قد الشهداء المصريين .. في كل الحروب عشان كل الناس .
    هو احنا غلطتنا ان احنا عملنا سلام .. لو اتكلمنا دلوقتي عليه هتلاقي الكل داخل يشتمنا عليه دلوقتي .. و أنا مش فاضية اعيد و ازيد في كلام اتقال بدل المرة 100 ..
    لنا الله … و للظالمين يومهم …
    شكرا أخي على رأيك الذي أعتز به

    يناير 3, 2009 عند 4:07 م

  3. السلام عليكم ..

    اول شي انتي يا أختي حرة اتقولي الي بتشوفيه ، سواء عجب غيرك والا ما عجبو، هاد رايك و بحيكي لانك عم قتوليه بكل جراة و صراحة.

    بس بدك تسمحيلي بالمقابل إني قول رايي بكل صراحة.

    و حتى ما ينفهم كلامي متل العادة اني بكره الشعب المصري والا مصر بقلك ارجعي اقري تعقيبي على تدوينة يحي لما قال انو ابيخجل من بلدو فرديت عيله انو ما تقول هيك بلدك بلد كلها كرامة و عزة و العيب بالبعض مو ببلدك.

    عودة للموضوع، انا بعيب عليكم عنصريتكم الشديدة لما ابتتكلموا عن مصر، طبعا الواحد مطالب انو ايحب بلدو و يشوفو احسن شي بس كمان مطالب ايكون موضوعي او على اقل تقدير يرفع من بلدو بس بحد المنطق، و لو كنتو واقعيين ما كنتوا اتعرضتوا ليلي اتعرضتوا الو.

    يعني لما بقرا بكلامك انو العرب اصلهم مصريين و هاجر كانت مصرية ، يعني كلامك مضحك جدا يا أختي الساحرة لا تزعلي مني، متل لما محمد عبدو صرح إنو الرسول صلى الله عله و سلم سعودي !

    معناها سيدنا آدم عيه السلام اذا كان نزولو على الارض مثلا كان بالصين معناها هو صيني، و فتنا بموجة العنصريات المقيتة، يعني بكرى ابيطلعوا اليهود بفنة غنو الرسول لفلاني اسرائيلي !

    يا أختي الساحرة، مصردولة متلها متل اي دولة في العالم، و المصريين بشر عاديين جدا حالهم حال الشعب في جزر القمر و جيبوني و كولالمبور أو حتى أمريكا و بريطانيا، يعني خلينا نلغي حالة العنصرية الموجودة دي.

    حتى في المطار بتلائي محطوط للمصريين و الاجانب، بفهم انو انا اعتبر بمصر اجنبي بس المفروض كون متميز عن الامريكي و البريطاني و حتى الصيني لاني عربي ، يعني بشتهاي لائي بالمطار او المعاملات الحكومية في مصر كلمة للمصريين للعرل و للاجانب مثلا ..

    على كل حال انا بدي علق على موضوع الهجمات على السفارات المصرية، انا ضد هل شي طبعا بس هدول شعوب ما ابتقدري تتحكمي بعاكفتهم و همن شايفين كيف حكومة مصر عم ترتكب اخطاء فادحة بحق الفلسطيين فلا تتوقعي منهم غير هيك.

    مبارح جابو دكتور في جامعة حلوان و هو من الحزب الحاكم عم بقول لمحطة الجزيرة انو كلام مبارك يمثل راي الشعب العام !! بالله هاد ما عم يسخر من 80 مليون مصري؟

    صدقيني انتو الشعب المصري عدوكم الاول ما الشعوب الي عم تهاجم مصر، انتو عجوكم الاول هل حكومة الي خليت اسم مصر الي كان فوق ايصير تحت و ما بس عربيا و حتى عالمياً.

    يناير 3, 2009 عند 6:23 م

  4. الساحرة الصغيرة

    السلام عليكم و رحمة الله و بركاته …
    أخي محمد …
    بالنسبة لموضوع أن الخوف من أن تفهم خطأ أعتقد اننا حسمنا الأمر منذ زمن ..
    المشكلة أن الموضوع تفاوت وجهات نظر … و أنا لا أقف حارسة على فكر كل إنسان ..
    أولا بالنسبة العنصرية التتي تتحدث عنها أخي .. أريدك أن تعود لقراءة ما كتبت ستجد أنني سخرت من المصريين الذي دخلوا للرد على السعودي .. و لم أقول أنهم فعلوا ما يجب فعله .. بالعك أنا كرهت فعلتهم مع انهم مصريين … صدقني أخي أنا أكره العنصرية .. لكن في بعض الأحيان يتطلب الأمر القليل من العنصرية المنطقية ..
    ثانيا بالنسبة لنقطة قولي أن جميع العرب مصريين هذا أقوله لأبين أنه حقا لو الأمور يتم قياسها بأن المصريين القدماء يهود يكون إذن العرب مصريين … يعني أنا لم أقرر أن هذه حقيقة .. و لم أضعها في قاموسي ..
    لم أقل أن المصريين خلقا غير بقية الخلق .. أو هناك ما يتفاضلون به على الجميع .. لكن بالطبع هناك مكانة ما و سورا داخل نفسي أضعهم فيه .. و أعتقد أنني لا ألام على هذا .. انها ذات المكانة التي تحتلها سوريا بالنسبة لك أخي .. أنا عاشقة لكل وطن لكن دوما هناك أولويات .. أولويات لن ألومك عليها و لن ألوم أخي الفلسطيني عليها و لن ألوم أخي السعودي أو اللبناني ..
    صدقني كل البلاد عدوها الأول الحكومات .. لأن أخطار الحكومات أكثر من أخطار الاحتلال .. لأن الاحتلال ساعتها يكون من ناس مثلك لا تستطيع أن تثور عليهم لأنك ستكون وحدك .. عموما أنا لا احب الكلام عن الحكومات … لأنني لم اتحمل مسئولية شعب من قبل .. حينما أجرب سأحدثكم عن الأمر …
    بتعرف أخي مش عارفة ليه دايما كلامك كله لا يوجد ما يعيبه إذا ناقشنا كل شيء بعقلانية .. لكن دائما تختتم الكلام العقلاني بعبارة ليست على ما يرام .. عمر اسم مصر ما تبقى تحت .. عارف ليه يمكن صحيح الشعب تحده الكثير من الحدود لكن أبناء مصر بالخارج يشرفونها .. و في أسوأ الظروف ينجحون و يبنون لأنفسهم مكانا بين رموز العالم و يفنون حياتهم في خدمة كل إنسان و لي مصر وحدها .. و آخرهم العالم عصام حجي .. و د. مصطفى السيد ..
    يعني بإذن الله عمر اسم مصر ماهيبقى تحت .. و هذا أيضا لا أرضاه لأي ون من أوطاني الأخرى ..
    تحياتي أخي

    يناير 4, 2009 عند 9:34 ص

  5. السلام عليكم ورحمة الله وبركاته
    أخوانى الكرام…
    أعتقد أن هذا الكلام ليس وقته الآن
    نحن نحاول نلملم جراحنا فى غزة
    فلا تفتحوا جراحاً أخرى.. ولاتفتحوا أبواب الشياطين
    أرجوكم أغلقوا كل الأبواب
    وافتحوا قلوبكم للحب والألفة والمودة
    جزاكم الله خيراً
    أخوكم
    محمد

    يناير 5, 2009 عند 9:25 م

  6. السلام عليكم ورحمة الله وبركاتة
    ازيك يا ساحرتي عامله ايه
    وحشني تدوينك الرائع
    وشكرا ليكي وعلي سوالك ليه بالمدونة
    وصراحة الكلام اللي اخرجتيه من قلب ما سمعت الان
    هو اقل ما يقال ولازم تتكلمي لان بجد الكلام هو اللي بيريح حاجاتكتير فينا
    وانا مع الاستاذ محمد ان ده مش وقت اننا نتكلم او ندع للشيطان مكان في وسطنا
    تحياتي لكي ساحرتي وعلي كلامك الجميل
    تقبلي مروري لكي

    يناير 7, 2009 عند 2:38 م

  7. التنبيهات: نقاش حاد جداً … « عين العقل

  8. كينان كرم

    اول شي نحنااا ما بعناااا ارضيناااا هيدا اولاً
    دي لعبة ولتعبت علينااا او بالاحر على اجدادناا
    والمصيبة انك كونك عربية وعم اتئولي هالحكي
    فــ هيدا شي بغيظ
    ابئى خدي بالك من كلامك

    يناير 12, 2010 عند 7:10 م

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s